التأصيل العلمي والإشاري لرسائل ليلة النصف من شعبان وأسرار التوبة

أوصي نفسي وإياكم بأن اللي مخاصم واحد يروح يصالحه، واللي مقاطع رحمه يروح يوصله، واللي معادي حد يسامحه، اللي مش قادر يعفي عنا نعفي إحنا عنه، اللي مش قادر يسامحنا إحنا نسامحه، اللي مش قادر يعمل الخير فينا إحنا إن شاء الله نعمل الخير فيه.
إن الله ليطلع إلى جميع خلقه في «ليلة النصف من شعبان» فيغفر لجميع خلقه إلا مشرك أو مشاحن⁽¹⁾.
يا ريت الناس اللي مخاصمة بعضها تفهم هذا الذوق، موانع المغفرة ناخد بالنا منها: إلا مشرك ومشاحن، والشحناء هذه تندرج عدة درجات، أولها أن الإنسان من الشحناء يكون مصر على كبيرة، لأن الخصومة هنا بينك وبين ربنا، من الشحناء ترك الصلاة، الاجتراء على معاصي الله، استعمال نعم الله في معاصي الله.
لا بد قبل «ليلة النصف من شعبان» تفك عقدة الإصرار، فالمؤمن لا يصر ولا يستكبر.
يعني نعمل إيه يا سيدنا الشيخ؟ يعني نتوب يا حبيبي، استغفر كتير وتوب كتير، وجهز نفسك لاطلاع الله على صفحاتك.
ما إحنا جاهزين ربنا يشوف صفحتنا! الاطلاع ده أنتم عارفين ليه؟ عشان يغفر، عشان يرحم، وإلا ما هو عارف أعمالنا ومحصيها عدداً.
أمال بيطلع ليه؟ لعل عاصٍ يعود، لعل غشاش في الميزان يقول يا واد كفاية كده بقى، لعل واحد واكل ورث أخواته يقول يا عم كفاية بقى ظلم في خلق الله، لعل قاطع رحم يروح يزور أهله، لعل مفسد في الأرض يتوب.
طب نستعد بده إزاي؟ بسيطة خالص، حاول وإحنا هنساعدك: «ما تقرب إليا عبدي شبراً الا تقربت إليه ذراعاً»⁽²⁾.
عارف الشبر ده ممكن يكون إيه؟ نية صادقة، صدقة.«من تقرب إليا ذراعاً تقربت إليه»، هيعينك على نفسك، هيسهل لك أمرك، هيزيل عنك حجابك.
الذنب اللي أنت مدمنه ومش قادر تبطل وضعيف عنده، فجأة كده تنبعث فيك قوة قوية وتقول الحمد لله تبت إلى الله فتلاقي نفسك دخلت على الجامع، بس جهز نفسك لكده، خد خطوة، فكر إنك تتوب كده ربنا هيساعدك.
ليه بقى؟ لأن من ملكات الحق سبحانه وتعالى ومن قدرته على خلقه أنه يحبب إلينا الإيمان ويزينه في قلوبنا ويكره إلينا الكفر والفسوق والعصيان⁽³⁾، وده من «الرشاد الإلهي».اللهم حبب إلينا الإيمان واستنقذ من قلوبنا ما جنيناه من حب العصيان.
إن الإنسان فجأة كده كان بيحب حاجة مش قادر يبطلها فجأة ما بقاش طايق ريحتها.
طب إيه اللي حصل؟ هو بقى عيبه يقول لك إيه: أصل أنا عندي عزيمة! عندك رب! لعل صدفتك عناية، مريت على موطن فيه رحمة، أنت رُحِمت، أنت عوفيت، اشكر ربنا على ذلك.
أنت عارف لما الإيمان يزدان في قلبك، الركعتين اللي كنت بصليّهم لأفر من الله بقيت بصليّهم لأفر إلى الله، الركعتين اللي كنت بقولهم بطريقة «أرحنا منها يا بلال» بقيت بصليّهم بطريقة «أرحنا بها يا بلال»⁽⁴⁾، لأن الإيمان ازدان في قلبك، لأن الله أقبل عليك.
ها شبر، إيه اللي مخلينا بنتخانق في البيوت ونزعل من بعض والخصامات والمحاكم مليانة مشاكل بين الأخ وأخوه، الزوج والزوجة، والبيوت التي تهتكت والجيرة التي انمحت آثارها، لما أثرت فينا النفس وتعاظمت فينا محنة الغرور.